АҚШ Марказий разведка бошқармаси (МРБ) сўроқлар чоғида сув билан қийнаш каби услублардан фойдаланмайди. Бу ҳақда бошқарма директори Жон Бреннан NBC телеканалига берган интервьюсида маълум қилган, дея хабар беради «ТАСС».
«Мен бу каби қатор услубларнинг қўлланишини ёқламайман, чунки ташкилотимиз ривожланиши керак. МРБнинг қайсидир ходими яна сув билан қийнашдан фойдаланишига розилик бермайман», — дея таъкидлаган Бреннан.
Бундай сўроқлар чоғида ётган ҳолда мажбурий ушлаб турилган кишининг боши сочиқ ёрдамида ўралади ва устидан сув қуйилади. Шу тариқа қийноққа солинган киши сувда чўкаётган одам ҳолига тушади.
2014 йил охирида АҚШ Конгресси мамлакат махсус хизматлари томонидан террорчиликда гумон қилинаётган шахсларга нисбатан қийноқлар қўллангани ҳақида расмий ҳисобот эълон қилган, шундан сўнг президент Барак Обама «Америка қадриятларига тўғри келмайдиган» бундай услублардан ортиқ ҳеч қачон фойдаланилмаслигини маълум қилганди.
Изоҳ (0)