Barak Obama yaqin kunlarda yadro xavfsizligi bo‘yicha sammitda ishtirok etish uchun AQShga keladigan Turkiya prezidenti Rajab Toyyib Erdo‘g‘on bilan uchrashuvdan bosh tortdi. Bu haqda “TASS” xabar bermoqda.
The Wall Street Journal nashrining AQSh ma’muriyatidagi manbasiga ko‘ra, Obama Erdo‘g‘onning qurilishi Turkiya tomonidan moliyalashtirilgan masjid ochilishida birga ishtirok etish to‘g‘risidagi so‘rovini rad etgan. Oq uyda Obamaning uchrashuvdan bosh tortgani hurmatsizlik sifatida qabul qilinmasligi lozimligi, ikki davlat rahbari noyabrda “yigirmalik” sammitida ko‘rishgani va fevralda telefon orqali muloqotda bo‘lgani ta’kidlangan. Shu bilan birga, The Wall Street Journal bildirganidek, Obamaning qarori Turkiyada o‘zgacha fikrlovchilarga bosim o‘tkazilishi va kurd isyonchilariga munosabatdan tashvishlanishni anglatadi.
Yadro xavfsizligi bo‘yicha sammit Vashingtonda 31-mart — 1-aprelda bo‘lib o‘tadi va unda 51 davlat delegatsiyasi ishtirok etishi kutilmoqda. AQSh prezidentining faqat bir shaxsiy muloqoti — Xitoy yetakchisi Si Szinpin bilan uchrashuv ko‘zda tutilgan. Rossiya sammitda qatnashmaydi.
Izoh (0)