Барак Обама яқин кунларда ядро хавфсизлиги бўйича саммитда иштирок этиш учун АҚШга келадиган Туркия президенти Ражаб Тоййиб Эрдўғон билан учрашувдан бош тортди. Бу ҳақда «ТАСС» хабар бермоқда.
The Wall Street Journal нашрининг АҚШ маъмуриятидаги манбасига кўра, Обама Эрдўғоннинг қурилиши Туркия томонидан молиялаштирилган масжид очилишида бирга иштирок этиш тўғрисидаги сўровини рад этган. Оқ уйда Обаманинг учрашувдан бош тортгани ҳурматсизлик сифатида қабул қилинмаслиги лозимлиги, икки давлат раҳбари ноябрда «йигирмалик» саммитида кўришгани ва февралда телефон орқали мулоқотда бўлгани таъкидланган. Шу билан бирга, The Wall Street Journal билдирганидек, Обаманинг қарори Туркияда ўзгача фикрловчиларга босим ўтказилиши ва курд исёнчиларига муносабатдан ташвишланишни англатади.
Ядро хавфсизлиги бўйича саммит Вашингтонда 31 март — 1 апрелда бўлиб ўтади ва унда 51 давлат делегацияси иштирок этиши кутилмоқда. АҚШ президентининг фақат бир шахсий мулоқоти — Хитой етакчиси Си Цзиньпин билан учрашув кўзда тутилган. Россия саммитда қатнашмайди.
Изоҳ (0)