AQShning Forbes jurnali jahonning eng badavlat odamlari yangi reytingini e’lon qildi. “Gazeta.ru” xabariga ko‘ra, milliarder Alisher Usmonov (boyligi — 12,5 milliard dollar) mazkur ro‘yxatda 73-o‘rinni, Rossiya boylari orasida esa uchinchi pog‘onani egallagan.
Forbes reytingiga ko‘ra, NOVATEK va “Sibur” egalaridan biri Leonid Mixelson Rossiyaning eng badavlat odamiga aylangan (boyligi — 14,4 milliard dollar, umumiy reytingda — 60-o‘rinda), undan keyingi o‘rinni “Alfa-grupp” egalaridan biri Mixail Fridman egallagan (boyligi — 13,3 milliard dollar, umumiy reytingda —63-o‘rinda).
Forbes ma’lumotlariga ko‘ra, 2015-yilda Rossiyaning eng boy uchala odami faqat boyigan: Mixelson 2,7 milliard dollarga, Fridman 1,3 milliard dollarga, Usmonov esa 1,9 milliard dollarga.
Umumiy reytingda 75 milliard dollarlik boylik bilan Microsoft asoschisi Bill Geyts peshqadam. Undan keyingi o‘rinda Zara brendi asoschisi, ispaniyalik Amansio Ortega (boyligi — 67 milliard dollar), Uorren Baffet (60,8 milliard dollar), meksikalik mediamagnat Karlos Slim (50 milliard dollar) va Amazon asoschisi Jeff Bezos (45,2 milliard dollar) bormoqda.
Facebook ijtimoiy tarmog‘i asoschisi va egasi, 31 yoshli Mark Sukerberg milliarderlarning kuchli yuzligidagi eng yosh milliarder hisoblanadi (reytingda — 6-o‘rinda, boyligi 44,5 milliard dollar). Reytingga kiritilgan 1,8 mingdan ortiq milliarder orasida eng yoshi norvegiyalik Aleksandra Andresendir — u 19 yoshda (reytingda 1476-o‘rinda, boyligi 1,2 milliard dollar).
Izoh (0)