Facebook’dagi “Maslahat.uz” guruhi a’zolaridan birining 3-sinfda o‘qiydigan qizi “Matematika” kitobidagi xatolikni topdi — kitob asli o‘zbek tilida bo‘lsa-da, muqova va muqovaning ichki tomoni rus tilida.
Mazkur holat guruhda bahs-munozaraga sabab bo‘ldi. Ko‘pchilik, xususan, xatolikni aniqlagan o‘quvchi qizning onasi ham bu holat uchun Xalq ta’limi vazirligini e’tiborsizlikda ayblagan, bunday xatoliklar o‘quvchilarni chalg‘itishidan norozilik bildirgan. Ba’zi foydalanuvchilar o‘zbekcha muqova yetmay qolganida, ruschasi qo‘yib yuborilgan bo‘lishi mumkin, degan taxminni ilgari surgan.
Darslikdagi chiqish ma’lumotlariga ko‘ra, kitob 2014-yil Toshkentdagi “Sharq” nashriyot-matbaa aksiyadorlik kompaniyasi tomonidan nashrdan chiqarilgan va Xalq ta’limi vazirligi tomonidan tasdiqlangan.
Munozaraga o‘zini Xalq ta’limi vazirligi tizimi xodimi deb tanishtirgan foydalanuvchi ham qo‘shilib, bu xatolik nashriyot aybi bilan yuz bergani, vazirlik o‘quvchilarga tarqatilayotgan barcha darsliklarni birma-bir tekshirish imkoniga ega emasligini tushuntirishga uringan.
“Aynan bu xatolik — nashriyotniki. Darsliklar nashrdan chiqqanidan so‘ng, nashriyot xodimlari tomonidan tekshiriladi. Nashriyotda tekshiruvdan o‘tgan darsliklarni Xalq ta’limi vazirligi tuzgan guruh ekspertizadan o‘tkazadi. Bunda, tirajga qarab, darsliklarning ma’lum bir qismi taxminiy olinib, birma-bir tekshiriladi. Barcha darsliklarni birma-bir ko‘rib chiqish imkoni yo‘q”, — dedi vazirlik tizimida ishlovchi foydalanuvchi.
Uning qo‘shimcha qilishicha, bunday darsliklarning qayta nashr davriyligi ikki yilda bir marta bo‘lib, keyingi nashrga tayyorlash jarayonida shu kabi xatoliklar hisobga olinib, bartaraf etiladi.
Izoh (0)