Facebook’даги «Maslahat.uz» гуруҳи аъзоларидан бирининг 3-синфда ўқийдиган қизи «Математика» китобидаги хатоликни топди — китоб асли ўзбек тилида бўлса-да, муқова ва муқованинг ички томони рус тилида.
Мазкур ҳолат гуруҳда баҳс-мунозарага сабаб бўлди. Кўпчилик, хусусан, хатоликни аниқлаган ўқувчи қизнинг онаси ҳам бу ҳолат учун Халқ таълими вазирлигини эътиборсизликда айблаган, бундай хатоликлар ўқувчиларни чалғитишидан норозилик билдирган. Баъзи фойдаланувчилар ўзбекча муқова етмай қолганида, русчаси қўйиб юборилган бўлиши мумкин, деган тахминни илгари сурган.
Дарсликдаги чиқиш маълумотларига кўра, китоб 2014 йил Тошкентдаги «Шарқ» нашриёт-матбаа акциядорлик компанияси томонидан нашрдан чиқарилган ва Халқ таълими вазирлиги томонидан тасдиқланган.
Мунозарага ўзини Халқ таълими вазирлиги тизими ходими деб таништирган фойдаланувчи ҳам қўшилиб, бу хатолик нашриёт айби билан юз бергани, вазирлик ўқувчиларга тарқатилаётган барча дарсликларни бирма-бир текшириш имконига эга эмаслигини тушунтиришга уринган.
«Айнан бу хатолик — нашриётники. Дарсликлар нашрдан чиққанидан сўнг, нашриёт ходимлари томонидан текширилади. Нашриётда текширувдан ўтган дарсликларни Халқ таълими вазирлиги тузган гуруҳ экспертизадан ўтказади. Бунда, тиражга қараб, дарсликларнинг маълум бир қисми тахминий олиниб, бирма-бир текширилади. Барча дарсликларни бирма-бир кўриб чиқиш имкони йўқ», — деди вазирлик тизимида ишловчи фойдаланувчи.
Унинг қўшимча қилишича, бундай дарсликларнинг қайта нашр даврийлиги икки йилда бир марта бўлиб, кейинги нашрга тайёрлаш жараёнида шу каби хатоликлар ҳисобга олиниб, бартараф этилади.
Изоҳ (0)