Amerikalik politsiyachilar Roki-Mauntin milliy bog‘iga safar chog‘ida rafiqasi Toni Bertoletni o‘ldirishda ayblab, Garold Xentornni hibsga oldi. Erkak turmush o‘rtog‘ini o‘ldirishni puxtalik bilan rejalashtirgani, uni jarlikka itarib yuborishdan avval birga suratga ham tushgani aytilmoqda. Bu haqda “Segodnya.ua” xabar berdi.
Dastlabki taxminlarga ko‘ra, juftlik turmush qurganlarining 12 yilligini nishonlash uchun Denverdagi milliy bog‘ga romantik sayrga borgan. Toni 40 metrli jarlikka qulaganida Garold darrov qutqaruv xizmatiga qo‘ng‘iroq qiladi va qutqaruvchilar hodisa joyiga zudlik bilan yetib kelishlarini talab qiladi, hatto ularning xarajatini to‘lashga ham rozi bo‘ladi. Afsuski, qutqaruvchilar kelganda boshidan og‘ir jarohat olgan Tonining saqlab qolishning imkoni bo‘lmaydi.
Garold bevaqt o‘lgan xotini uchun ko‘z yoshi to‘kib yurganda politsiya ayol qoyadan sirg‘anib, jarlikka qulamagani, balki bunga kimdir yordam berganini aniqladi. Shuningdek, Garoldning mashinasidan milliy bog‘ xaritasi topiladi, unda esa hodisa ro‘y bergan joyga belgi qo‘yilgandi.
Bundan tashqari, Garoldning birinchi turmush o‘rtog‘i Sandraning 1995-yilda nobud bo‘lishi ham shubha uyg‘otadi. O‘sha paytda bu holat baxtsiz tasodifga yo‘yilgan, biroq endi politsiya buni ham qasddan qotillik sifatida ko‘rmoqda. 20 yil avval Garold va Sandra do‘stlarining oldiga ketayotganda erkakka avtomobilining g‘ildiragi teshilgandek tuyuladi. U mashinani domkratda ko‘tarib, xotiniga uning ostiga bolt tushib ketganini aytadi. Sandra uni olishga harakat qilayotganida avtomobil ayolni bosib qoladi.
E’tibor beradigan joyi shuki, Garold ikki rafiqasi bilan ham 12 yildan yashagan. 2015-yili Toni Bertoletning hayoti 3,3 million funt sterlingga sug‘urta qilingani esa politsiya shubhasini yanada oshirdi.
Izoh (0)