Америкалик полициячилар Роки-Маунтин миллий боғига сафар чоғида рафиқаси Тони Бертолетни ўлдиришда айблаб, Гарольд Хенторнни ҳибсга олди. Эркак турмуш ўртоғини ўлдиришни пухталик билан режалаштиргани, уни жарликка итариб юборишдан аввал бирга суратга ҳам тушгани айтилмоқда. Бу ҳақда «Сегодня.ua» хабар берди.
Дастлабки тахминларга кўра, жуфтлик турмуш қурганларининг 12 йиллигини нишонлаш учун Денвердаги миллий боғга романтик сайрга борган. Тони 40 метрли жарликка қулаганида Гарольд дарров қутқарув хизматига қўнғироқ қилади ва қутқарувчилар ҳодиса жойига зудлик билан етиб келишларини талаб қилади, ҳатто уларнинг харажатини тўлашга ҳам рози бўлади. Афсуски, қутқарувчилар келганда бошидан оғир жароҳат олган Тонининг сақлаб қолишнинг имкони бўлмайди.
Гарольд бевақт ўлган хотини учун кўз ёши тўкиб юрганда полиция аёл қоядан сирғаниб, жарликка қуламагани, балки бунга кимдир ёрдам берганини аниқлади. Шунингдек, Гарольднинг машинасидан миллий боғ харитаси топилади, унда эса ҳодиса рўй берган жойга белги қўйилганди.
Бундан ташқари, Гарольднинг биринчи турмуш ўртоғи Сандранинг 1995 йилда нобуд бўлиши ҳам шубҳа уйғотади. Ўша пайтда бу ҳолат бахтсиз тасодифга йўйилган, бироқ энди полиция буни ҳам қасддан қотиллик сифатида кўрмоқда. 20 йил аввал Гарольд ва Сандра дўстларининг олдига кетаётганда эркакка автомобилининг ғилдираги тешилгандек туюлади. У машинани домкратда кўтариб, хотинига унинг остига болт тушиб кетганини айтади. Сандра уни олишга ҳаракат қилаётганида автомобиль аёлни босиб қолади.
Эътибор берадиган жойи шуки, Гарольд икки рафиқаси билан ҳам 12 йилдан яшаган. 2015 йили Тони Бертолетнинг ҳаёти 3,3 миллион фунт стерлингга суғурта қилингани эса полиция шубҳасини янада оширди.
Изоҳ (0)