Boburiylar avlodidan bo‘lgan imperator Jahongir tomonidan 400 yil avval zarb ettirilgan va burjiy chayon aks ettirilgan tilla moxur (tanga) Mumbaydagi auksionda rekord darajadagi summa — 15,5 million rupiy (235 ming dollar)ga sotildi. Bu haqda “TASS” xabar bermoqda.
“Bu Hindistonda chiqarilgan tanga uchun berilgan eng yuqori narx. Oldingi rekord 4,5 million rupiy (68 ming dollar)dan iborat edi”, — deya ma’lum qilgan Todywalla auksion uyi vakili Malkolm Todivalla.
Diametri 2 santimetr bo‘lgan “tilla chayon”ga 8 million rupiy boshlang‘ich narx qo‘yilgandi. Yakunda esa auksion uyi rejalashtirganidan ikki barobar ko‘p mablag‘ ishlab oldi. Tangani sotib olgan va o‘zini oshkor etmagan mumbaylik biznesmen ham ziyon ko‘rmasligi aniq: 6-yanvar kuni Nyu-Yorkda bo‘lib o‘tgan kimoshdi savdosida shunga o‘xshash tanga 450 ming dollarga sotilgani aytilmoqda.
Mumbaydagi auksionda Jahongir vafotidan so‘ng uning rafiqasi malika Nurjahon tomonidan chiqarilgan tanga ham xaridorini topdi: savdoga 5 million rupiy boshlang‘ich baho bilan chiqarilgan tanga 7,6 million rupiy (115 ming dollar)ga sotildi.
Tilla moxur ilk bor Jahongirning otasi, imperator Akbar tomonidan 1562-yilda chiqarilgan. Uning probasi o‘ta yuqori (kamida 980), og‘irligi esa 11 gramm atrofida bo‘lgan. Moxur barcha musulmon davlatlari tangalari kabi tasvirlarsiz bo‘lgan. Jahongir o‘zi hukmronlik qilgan davrda (1605—1627) bu tartibni o‘zgartirib, burj belgilari tasvirlangan va hozirda butun dunyo kolleksionerlari orzusiga aylangan tangalar turkumini chiqargan.
Izoh (0)