Nyu-Yorkning sobiq meri, Bloomberg axborot agentligi egasi Maykl Blumberg AQSh prezidentligi uchun saylovlarda mustaqil nomzod sifatida ishtirok etishga hozirlik ko‘rmoqda. Bu haqda New York Times manbalariga tayanib, “TASS” xabar bermoqda.
Nashr ma’lumotlariga ko‘ra, 73 yoshli milliarder do‘stlari va tarafdorlariga saylovoldi kurashi uchun o‘z mablag‘i hisobidan kamida 1 milliard dollar sarflashga tayyor ekanligini ma’lum qilgan. Yordamchilariga esa 1912-yildan beri mustaqil nomzodlar tomonidan o‘tkazilgan saylov kampaniyalari tarixini o‘rganish yuzasidan ko‘rsatma bergan.
Yakuniy qarorga hali qabul qilinmagan, Blumberg buning uchun o‘ziga martga qadar vaqt bergan. Ushbu muddat milliarderga saylovlar to‘g‘risidagi qonunni buzmay, mamlakatning 50 shtatida mustaqil nomzod sifatida ro‘yxatdan o‘tish uchun barcha talablarni bajarish imkonini beradi.
Ta’kidlanishicha, ekspertlar omadsizlikka uchrashini bashorat qilgan, biroq sanoqli oylar mobaynida respublikachi nomzodlar o‘rtasida yetakchiga aylangan Donald Trampning muvaffaqiyati Blumbergning shunday qarorga kelishiga turtki bo‘lgan.
Izoh (0)