Tailand janubida samolyot bo‘laklari topildi, u Malayziya “Boing”iga tegishli bo‘lishi mumkin

Tailandning janubiy sohillarida samolyot bo‘laklari topildi, ular 2014-yil martida yo‘qolib qolgan Malayziya “Boing”iga tegishli deb taxmin qilinmoqda. Bu haqda “TASS” xabar bermoqda.

Ulkan qayrilma metall parchasi Nakxonsitxammart provinsiyasida qirg‘oqqa chiqib qolgan, aholi uni aniqlashtirishda yordam so‘rab hukumatga murojaat qilgan. Bo‘lakning kattaligi eniga ikki metr, bo‘yiga uch metrni tashkil qilgan.

Topilma ko‘plab taxminlarni keltirib chiqargan, biroq Tailand OAVlari uning Malayziya “Boing”iga taalluqligi bo‘lishi mumkinligi haqidagi versiyani ilgari surdi. Rasmiy versiya taqdim etilganicha yo‘q.

Malaysia Airlines’ning Kuala-Lumpurdan Pekinga uchib ketayotgan samolyoti 2014-yil 8-martga o‘tar kechasi radarlardan yo‘qolib qolgan edi. Kema bortida 239 kishi bo‘lgan.