Нью-Йоркнинг собиқ мери, Bloomberg ахборот агентлиги эгаси Майкл Блумберг АҚШ президентлиги учун сайловларда мустақил номзод сифатида иштирок этишга ҳозирлик кўрмоқда. Бу ҳақда New York Times манбаларига таяниб, «ТАСС» хабар бермоқда.
Нашр маълумотларига кўра, 73 ёшли миллиардер дўстлари ва тарафдорларига сайловолди кураши учун ўз маблағи ҳисобидан камида 1 миллиард доллар сарфлашга тайёр эканлигини маълум қилган. Ёрдамчиларига эса 1912 йилдан бери мустақил номзодлар томонидан ўтказилган сайлов кампаниялари тарихини ўрганиш юзасидан кўрсатма берган.
Якуний қарорга ҳали қабул қилинмаган, Блумберг бунинг учун ўзига мартга қадар вақт берган. Ушбу муддат миллиардерга сайловлар тўғрисидаги қонунни бузмай, мамлакатнинг 50 штатида мустақил номзод сифатида рўйхатдан ўтиш учун барча талабларни бажариш имконини беради.
Таъкидланишича, экспертлар омадсизликка учрашини башорат қилган, бироқ саноқли ойлар мобайнида республикачи номзодлар ўртасида етакчига айланган Дональд Трампнинг муваффақияти Блумбергнинг шундай қарорга келишига туртки бўлган.
Изоҳ (0)