Burkina-Fasoda mehmonxonaga hujum uyushtirildi, halok bo‘lgan va garovga olinganlar bor

15-yanvar, juma kuni kechki payt Burkina-Faso poytaxti Uagadugudagi Splendid Hotel  mehmonxonasiga hujum uyushtirildi. Bu haqda Meduza xabar bermoqda.

Guvohlarning ta’kidlashicha, qurollangan bir necha kishi mehmonxona atrofidagi ko‘chada o‘t ochgan va mashinalarni yoqib yuborgan, so‘ng mehmonxonaga bostirib kirgan va bu yerda xavfsizlik xizmati bilan otishma boshlangan.

Hodisa oqibatida kamida 20 kishi halok bo‘lgani va 15 kishi jarohatlangani aytilmoqda. Politsiya mehmonxonada istiqomat qilayotganlar garovga olingani haqida xabar berdi, ularning soni hozircha aniq emas.

Burkina-Faso xavfsizlik xizmati Splendid Hotel binosini shturm qilishni boshlagan. Operatsiya davomida portlovchi vositalardan foydalanilgani tufayli mehmonxonada yong‘in chiqqan. Mahalliy OAV ma’lumotlariga ko‘ra, binodan 12 kishini olib chiqishga muvaffaq bo‘lingan.

Mehmonxonaga uyushtirilgan hujum uchun javobgarlikni “Mag‘ribdagi Al-Qoida” guruhi o‘z zimmasiga olgan.