Tojikiston hukumati qoshidagi til va atamashunoslik qo‘mitasi yangi tug‘ilgan chaqaloqlarga berish mumkin bo‘lgan ismlarning yagona ro‘yxatini tayyorlamoqda, deb yozadi “Interfaks”.
Jarayonga Fanlar akademiyasi yetakchi mutaxassislari, OTMlar professorlari, tilshunoslar, Tojikiston Milliy ensiklopediyasi ilmiy nashriyoti xodimlari jalb qilingan.
Shu yil oxiri, kelasi yil boshigacha chop etilishi rejalashtirilayotgan ro‘yxatdan taxminan 4—5 mingta zamonaviy va qadimiy tojik ismlari o‘rin oladi. Har bir ismning ma’nosi, forscha ekvivalenti, lotin alifbosidagi transkripsiyasi keltiriladi. “U fuqarolik holatlari dalolatnomalarini yozish bo‘limlari xodimlari uchun eng zarur kitob bo‘ladi”, — dedi qo‘mita xodimi.
Nashr eslatishicha, Tojikiston adliya vazirligi aprel oyidayoq “Fuqarolik holatlari dalolatnomalarini davlat ro‘yxatidan o‘tkazish to‘g‘risida”gi qonunga o‘zgartirishlar kiritish tashabbusi bilan chiqqan edi.
Qonun loyihasiga ko‘ra, “milliy madaniyatga begona ismlar, buyum, mahsulot, jonivor va qushlar nomlari, shuningdek, inson obro‘si va qadr-qimmatini pasaytiradigan, kishilarni kastalarga bo‘ladigan ismlar” taqiqlanadi.
Izoh (0)