“Nur.kz” internet-nashri Qozog‘istonda tashkil etilgan eng esda qolarli to‘y marosimlari ro‘yxatini tuzdi.
Osmondagi to‘y
2011-yili Olmaotada g‘alati to‘y bo‘lib o‘tdi. Kelinning otasi yoshlarga kutilmagan sovg‘a uyushtirib, kelin va kuyovni samolyotga olib chiqdi va 13 ming metr balandlikda kema kapitani sifatida ularni er-xotin deb e’lon qildi.
Subaru ishqibozlarining avtosalonda o‘tgan to‘yi
Olmaotada istiqomat qiluvchi boshqa bir kelin-kuyov esa ko‘k Subaru avtomobillaridan iborat uzun kortejda shaharni sayr qilishi bilan odamlarni hayron qoldirgan. Nikoh marosimi esa bo‘lajak er-xotinning sevimli avtomobillari sotiladigan avtosalonda bo‘lib o‘tgan.
Avtoservisdagi to‘y
Olmaotalik Yegor va Anastasiya boshqalardan ajralib turishning ajoyib yo‘lini topdi — ular eski, usti ochiq mashinada ketayotganida, ssenariy bo‘yicha ularni yo‘l politsiyasi xodimi to‘xtatib, bunday mashinada shaharda harakatlanish mumkin emasligini ma’lum qiladi.
Shundan so‘ng mehmonlar va kelin-kuyov to‘y mashinasini bezashga kirishadi. Eng qizig‘i, yoshlar o‘z nikohini FHDYo bo‘limining rasmiy hujjatida emas, balki “oilaviy hayotning texnik pasporti”ga qayd ettiradi.
Limuzin o‘rniga avtobus
Aktobelik kuyov o‘z suyuklisining oldiga hammaga o‘xshab limuzinda emas, yurakchalar, pufakchalar va kelin-kuyovning suratlari bilan bezatilgan jamoat transportida kelgan.
Egizak opa-singilga uylangan egizak aka-uka
Ushbu noodatiy to‘y Aktauda bo‘lib o‘tgan. U yerda egizak aka-uka To‘rebek va Jo‘ldasbek To‘lepbergenuli egizak opa-singil Asil va Ayim Binazarovalarga uylangan.
Mazkur hayratlanarli holat barcha qozog‘istonliklarni qiziqtirib qo‘ydi, yosh kelin-kuyovlar esa turli teleko‘rsatuvlar qahramoniga aylandi.
Nursulton Nazarboyevga taklifnoma
Kostanayda istiqomat qiluvchi juftlik to‘yga shaxsan mamlakat prezidentini taklif qilish uchun o‘zida kuch topa oldi.
Albatta, Nursulton Nazarboyev to‘yga kela olmadi, biroq uning o‘rniga viloyat akimi (hokimi) mehmon bo‘lib, yoshlarga prezident tabrigini yetkazdi.
Mehribonlik uyidagi to‘y
Janubiy Qozog‘iston viloyatida Meyirmon va Saniya tomonidan uyushtirilgan tantanalar hurmatga loyiq. Dabdabali to‘y va ma’nosiz sarf-xarajatlar o‘rniga ular o‘z hayotlaridagi eng muhim kunni boshqacha nishonladi — yoshlar restoranda emas, balki mehribonlik uyida bayramona dasturxon yozdi.
Baxtli kundagi quvonchini kim bilandir baham ko‘rish orzusida bo‘lgan kelin-kuyov haqiqatan ham o‘z niyatiga yetdi.
Izoh (0)