Қозоғистоннинг энг ёдда қоларли тўйлари (фото)

«Nur.kz» интернет-нашри Қозоғистонда ташкил этилган энг эсда қоларли тўй маросимлари рўйхатини тузди.

Осмондаги тўй

2011 йили Олмаотада ғалати тўй бўлиб ўтди. Келиннинг отаси ёшларга кутилмаган совға уюштириб, келин ва куёвни самолётга олиб чиқди ва 13 минг метр баландликда кема капитани сифатида уларни эр-хотин деб эълон қилди.

Subaru ишқибозларининг автосалонда ўтган тўйи

Олмаотада истиқомат қилувчи бошқа бир келин-куёв эса кўк Subaru автомобилларидан иборат узун кортежда шаҳарни сайр қилиши билан одамларни ҳайрон қолдирган. Никоҳ маросими эса бўлажак эр-хотиннинг севимли автомобиллари сотиладиган автосалонда бўлиб ўтган.

Автосервисдаги тўй

Олмаоталик Егор ва Анастасия бошқалардан ажралиб туришнинг ажойиб йўлини топди — улар эски, усти очиқ машинада кетаётганида, сценарий бўйича уларни йўл полицияси ходими тўхтатиб, бундай машинада шаҳарда ҳаракатланиш мумкин эмаслигини маълум қилади.

Шундан сўнг меҳмонлар ва келин-куёв тўй машинасини безашга киришади. Энг қизиғи, ёшлар ўз никоҳини ФHDЁ бўлимининг расмий ҳужжатида эмас, балки «оилавий ҳаётнинг техник паспорти»га қайд эттиради.

Лимузин ўрнига автобус

Актобелик куёв ўз суюклисининг олдига ҳаммага ўхшаб лимузинда эмас, юракчалар, пуфакчалар ва келин-куёвнинг суратлари билан безатилган жамоат транспортида келган.

Эгизак опа-сингилга уйланган эгизак ака-ука

Ушбу ноодатий тўй Актауда бўлиб ўтган. У ерда эгизак ака-ука Тўребек ва Жўлдасбек Тўлепбергенули эгизак опа-сингил Асил ва Айим Биназароваларга уйланган.

Мазкур ҳайратланарли ҳолат барча қозоғистонликларни қизиқтириб қўйди, ёш келин-куёвлар эса турли телекўрсатувлар қаҳрамонига айланди.

Нурсултон Назарбоевга таклифнома

Костанайда истиқомат қилувчи жуфтлик тўйга шахсан мамлакат президентини таклиф қилиш учун ўзида куч топа олди.

Албатта, Нурсултон Назарбоев тўйга кела олмади, бироқ унинг ўрнига вилоят акими (ҳокими) меҳмон бўлиб, ёшларга президент табригини етказди.

Меҳрибонлик уйидаги тўй

Жанубий Қозоғистон вилоятида Мейирмон ва Сания томонидан уюштирилган тантаналар ҳурматга лойиқ. Дабдабали тўй ва маъносиз сарф-харажатлар ўрнига улар ўз ҳаётларидаги энг муҳим кунни бошқача нишонлади — ёшлар ресторанда эмас, балки меҳрибонлик уйида байрамона дастурхон ёзди.

Бахтли кундаги қувончини ким биландир баҳам кўриш орзусида бўлган келин-куёв ҳақиқатан ҳам ўз ниятига етди.