O‘zbekistonlik eshkakchi Olga Umaraliyeva Rio—2016 o‘yinlari yo‘llanmasini qo‘lga kiritdi

2015-yil 4—8-noyabr kunlari Indoneziyaning Palembang shahrida baydarka va kanoeda eshkak eshish bo‘yicha o‘tkazilgan Osiyo chempionatida o‘zbekistonlik yana bir sportchi Olga Umaraliyeva qit’a chempionatining oltin medallari bilan birga, 2016-yili Rio-de-Janeyro shahri (Braziliya)da o‘tkaziladigan XXXI yozgi Olimpiada o‘yinlarining yo‘llanmasi uchun belgilangan me’yorni bajardi. Bu haqda O‘zbekiston Milliy olimpiya qo‘mitasi matbuot xizmati xabar bermoqda.

Baydarkada eshkak eshish bo‘yicha 200 metr masofaga o‘tkazilgan yakkalik poygalarida Olga marra chizig‘iga birinchi bo‘lib yetib keldi.

Eslatib o‘tamiz, bunga qadar ushbu qit’a chempionatida O‘zbekiston terma jamoasi a’zolari Aleksey Mochalov baydarkada, Gerasim Kochnev esa kanoeda eshkak eshish bo‘yicha yakkalik qayiqda 1000 metr masofaga o‘tkazilgan poygada birinchi o‘rinni egalladi. Kanoeda eshkak eshish bo‘yicha ikki kishilik qayiqda 1000 metr masofaga bo‘lib o‘tgan poygada Vadim Menkov va Serik Mirbekov shohsupaning eng yuqori pog‘onasiga ko‘tarildi.

Shu tariqa, Palembang shahrida baydarka va kanoeda eshkak eshish bo‘yicha o‘tkazilgan Osiyo chempionatida bir yo‘la besh nafar o‘zbekistonlik eshkakchi 2016-yili Rio-de-Janeyroda o‘tkaziladigan XXXI yozgi Olimpiada o‘yinlarining yo‘llanmasi uchun belgilangan me’yorni bajardi.