Rossiyalik 8 nafar sportchi 2012-yilgi London Olimpiadasi oldidan yengil atletika federatsiyalari xalqaro assotsiatsiyasi (IAAF) amaldorlariga yirik miqdorda pora berilgandan so‘ng doping tufayli diskvalifikatsiyadan qutulib qolgan. Keyinchalik ularning barchasi mazkur nufuzli musobaqa g‘oliblari va sovrindorlari bo‘lgan. Bu haqda Buyuk Britaniyaning The Sunday Times nashri ma’lum qildi, deya xabar beradi “Gazeta.ru”.
Porani IAAF sobiq prezidenti Lamine Diak va assotsiatsiya antidoping departamenti sobiq rahbari Gabriel Dolle olgan, uning umumiy miqdori 1,2 million dollarni tashkil etgan.
Eslatib o‘tamiz, 4-noyabr kuni Lamine Diak korrupsiyada ayblanib, hibsga olingan. Diak va uning advokati Rossiya yengil atletika federatsiyasidan pora olishda gumon qilinmoqda.
Izoh (0)