YuKOSning sobiq aksiyadorlari tomonidan berilgan da’volar sabab hibsga olingan Rossiyaning xorijdagi aktivlari orasida Euronews telekanaliga egalik qiluvchi Fransiyaning Euronews S.A. kompaniyasining Butunrossiya davlat teleradiokompaniyasi (VGTRK) ixtiyorida bo‘lgan 7,5 foiz aksiyasi ham bor. Bu haqda “RBK” xabar bermoqda.
Fransiya telekompaniyasiga yaqin manbalarning ma’lum qilishicha, aktivlarning hibsga olinishi Euronews’ning ham, VGTRKning ham faoliyatiga jiddiy ta’sir ko‘rsatmagan. YuKOSning sobiq aksiyadorlari vakillari ham, Euronews ham mazkur axborot yuzasidan izoh berganicha yo‘q.
“Aktivlarning hibsga olinishi kamida ularni boshqarish, ya’ni ularni sotish, egalik huquqini boshqa birovga berish imkoni yo‘qligini bildiradi. Qolgani sud qaroriga bog‘liq: hibsga olish aksiyalarni garovga qo‘yish, ular orqali ovoz berish, ular bo‘yicha dividendlar olish kabilarni taqiqlashni ham nazarda tutishi mumkin”, — deydi huquqshunos Ilya Rachkov.
Fransiyaning Euronews S.A. kompaniyasi 1993-yilda ishga tushgan va 13 tilda kunu tun efirga chiquvchi Euronews telekanaliga egalik qiladi. Euronews dasturlarini jahonning 158 mamlakatidagi 425 million xonadonda tomosha qilish mumkin.
Izoh (0)