Buyuk Britaniya YeI tarkibidan chiqsa, Shotlandiyada mustaqillik bo‘yicha referendum o‘tkazilishi ma’lum qilindi

Buyuk Britaniya Yevroittifoqdan chiqqudek bo‘lsa, Shotlandiya mustaqilligi bo‘yicha referendumni qaytadan o‘tkazishga to‘g‘ri keladi. Bu haqda Shotlandiya milliy partiyasi yetakchisi Nikola Sterjen ma’lum qilgan, deya xabar beradi “TASS”.

Sterjenning aytishiga ko‘ra, Birlashgan qirollik 2017-yil o‘tkaziladigan referendum yakunlari bo‘yicha YeIdan chiqishi mumkinligi to‘g‘risidagi taxminlar mintaqa mustaqilligi yuzasidan navbatdagi ovoz berishni rejalashtirishga turtki bo‘lishi mumkin.

“Shotlandiya o‘z istagiga qarshi o‘laroq YeIdan tashqarida qolgudek bo‘lsa, Buyuk Britaniyadan ajralib chiqish bo‘yicha referendum masalasiga ehtiyoj tug‘iladi va bu jarayonni to‘xtatib bo‘lmaydi”, — deya ta’kidlagan partiya yetakchisi.

2014-yil, 18-sentabrda Shotlandiya milliy partiyasi tashabbusi bilan o‘tkazilgan referendum mustaqillik tarafdorlarining mag‘lubiyati bilan yakunlangan: ovoz berganlarning 55 foizi ajralib chiqishga qarshi bo‘lgan, 45 foizi esa buni qo‘llab-quvvatlagandi.

Eslatib o‘tamiz, oldinroq Buyuk Britaniya rasmiylari mamlakat Yevropa Ittifoqi tarkibida qolish shartlarini ma’lum qilgani haqida xabar berilgan edi.