Буюк Британия Евроиттифоқдан чиққудек бўлса, Шотландия мустақиллиги бўйича референдумни қайтадан ўтказишга тўғри келади. Бу ҳақда Шотландия миллий партияси етакчиси Никола Стержен маълум қилган, дея хабар беради «ТАСС».
Стерженнинг айтишига кўра, Бирлашган қироллик 2017 йил ўтказиладиган референдум якунлари бўйича ЕИдан чиқиши мумкинлиги тўғрисидаги тахминлар минтақа мустақиллиги юзасидан навбатдаги овоз беришни режалаштиришга туртки бўлиши мумкин.
«Шотландия ўз истагига қарши ўлароқ ЕИдан ташқарида қолгудек бўлса, Буюк Британиядан ажралиб чиқиш бўйича референдум масаласига эҳтиёж туғилади ва бу жараённи тўхтатиб бўлмайди», — дея таъкидлаган партия етакчиси.
2014 йил, 18 сентябрда Шотландия миллий партияси ташаббуси билан ўтказилган референдум мустақиллик тарафдорларининг мағлубияти билан якунланган: овоз берганларнинг 55 фоизи ажралиб чиқишга қарши бўлган, 45 фоизи эса буни қўллаб-қувватлаганди.
Эслатиб ўтамиз, олдинроқ Буюк Британия расмийлари мамлакат Европа Иттифоқи таркибида қолиш шартларини маълум қилгани ҳақида хабар берилган эди.
Изоҳ (0)