Qozonda harbiy xizmatchi oltinchi qavatdan yiqilgan qizchani tutib qoldi

Qozon shahrida Rossiya IIV ichki qo‘shinlarining Volgabo‘yi mintaqaviy qo‘mondonligi maxsus maqsadlardagi otryadi harbiy xizmatchisi Aleksey Vasilyev oltincha qavatdan yiqilgan uch yoshli qizchani tutib qoldi, deb xabar bermoqda “Biznes Online”.

Xizmatdan qaytayotib, Vasilyev ko‘p qavatli uylardan birining oldida odamlar to‘planib turganini ko‘rgan. Ular oltinchi qavat balkoni panjarasiga osilib turgan qizchani kuzatib turgan edi. Harbiy xizmatchi uy yaqiniga borib, yiqilgan qizchani o‘z qo‘llarida tutib qolgan.

Voqea joyiga yetib kelgan tez yordam xodimlari qizcha jiddiy jarohat olmaganini qayd etgan. Vasilyevning safdoshlari uning ushbu harakati to‘g‘risida bir haftadan keyin, u tibbiyot punktiga murojaat qilgach xabar topgan. Ma’lum bo‘lishicha, qizchani qutqarayotib, uning qo‘li singan. Harbiy qism komandiri ushbu harakati uchun harbiy xizmatchiga “Qutqarish yo‘lidagi jasorati uchun” medaliga tavsiya qilishga qaror qilgan.