Xitoylik iqtisodchilarning prognoziga ko‘ra, yil oxiriga borib dollar kursi 7 yuanga, 2016-yil oxiriga borib esa 8 yuanga o‘sishi mumkinligini istisno qilib bo‘lmaydi. “RBK”ning yozishicha, bu holatda Xitoy milliy valyutasi hozirgi 6,41 yuanlik ko‘rsatkichdan 20 foizga qadrsizlanadi.
Xitoy davlat tuzilmalari tomonidan tayyorlangan tadqiqotlarda qayd etilishicha, mazkur prognoz avgust oyi o‘rtalarida yuan kursi 3 foizga qadrsizlanganidan so‘ng berilgan. Ayni vaqtda, Bloomberg’ning tahlilchilarga asoslanib yozishicha, 2015-yil oxirida dollar 6,5 yuandan o‘smaydi.
Xitoy xalq banki raisi o‘rinbosari I Gan 13-avgust kuni bo‘lib o‘tgan brifing chog‘ida regulyator, eksport hajmini oshirish maqsadida, yuanning 10 foizga devalvatsiya bo‘lishiga yo‘l qo‘ymasligini ma’lum qilgandi. Bloomberg’ning hisob-kitoblariga ko‘ra, yil oxirigacha bir dollar 7 yuangacha o‘sishi ehtimoli 9 foizga, 2016-yil oxiriga borib esa 8 yuanga yetishi ehtimoli 5 foizga teng.
Xitoy xalq bankining Monetar siyosat qo‘mitasi sobiq a’zosi Yu Yundinning fikricha, yuanni qadrsizlanishdan saqlab qolish juda katta valyuta zaxiralarining sarflanishini talab etishi mumkin. U valyuta intervensiyalarini imkon qadar kamaytirib, kursni belgilashni bozor ixtiyoriga qoldirish kerak, deb hisoblaydi. Uning qayd etishicha, yuanning sezilarli darajada qadrsizlanishi ehtimoli kam, chunki Xitoy yetarli darajada katta savdo profitsitiga ega.
Commerzbank’ning Singapurdagi bo‘linmasi iqtisodchisi Chjou Xao Pekin yuanning 1 dollar uchun 7 yuan miqdorida qadrsizlanishiga yo‘l qo‘ymaydi, chunki voqealarning bunday rivoji tashqi qarzlar bo‘yicha to‘lovlarni amalga oshirish va kapitallar harakatiga oldindan bilib bo‘lmaydigan darajada bosim o‘tkazishi mumkin.
Izoh (0)