Хитойлик иқтисодчиларнинг прогнозига кўра, йил охирига бориб доллар курси 7 юанга, 2016 йил охирига бориб эса 8 юанга ўсиши мумкинлигини истисно қилиб бўлмайди. «RBK»нинг ёзишича, бу ҳолатда Хитой миллий валютаси ҳозирги 6,41 юанлик кўрсаткичдан 20 фоизга қадрсизланади.
Хитой давлат тузилмалари томонидан тайёрланган тадқиқотларда қайд этилишича, мазкур прогноз август ойи ўрталарида юань курси 3 фоизга қадрсизланганидан сўнг берилган. Айни вақтда, Bloomberg’нинг таҳлилчиларга асосланиб ёзишича, 2015 йил охирида доллар 6,5 юандан ўсмайди.
Хитой халқ банки раиси ўринбосари И Ган 13 август куни бўлиб ўтган брифинг чоғида регулятор, экспорт ҳажмини ошириш мақсадида, юаннинг 10 фоизга девалвация бўлишига йўл қўймаслигини маълум қилганди. Bloomberg’нинг ҳисоб-китобларига кўра, йил охиригача бир доллар 7 юангача ўсиши эҳтимоли 9 фоизга, 2016 йил охирига бориб эса 8 юанга етиши эҳтимоли 5 фоизга тенг.
Хитой халқ банкининг Монетар сиёсат қўмитаси собиқ аъзоси Ю Юндиннинг фикрича, юанни қадрсизланишдан сақлаб қолиш жуда катта валюта захираларининг сарфланишини талаб этиши мумкин. У валюта интервенсияларини имкон қадар камайтириб, курсни белгилашни бозор ихтиёрига қолдириш керак, деб ҳисоблайди. Унинг қайд этишича, юаннинг сезиларли даражада қадрсизланиши эҳтимоли кам, чунки Хитой етарли даражада катта савдо профицитига эга.
Commerzbank’нинг Сингапурдаги бўлинмаси иқтисодчиси Чжоу Хао Пекин юаннинг 1 доллар учун 7 юань миқдорида қадрсизланишига йўл қўймайди, чунки воқеаларнинг бундай ривожи ташқи қарзлар бўйича тўловларни амалга ошириш ва капиталлар ҳаракатига олдиндан билиб бўлмайдиган даражада босим ўтказиши мумкин.
Изоҳ (0)