Rossiya va Ukraina tomonidan Kioto protokoli talablariga rioya etilmayotgani sabab, xalqaro hamjamiyatning issiqxona gazi chiqarilishi va iqlim o‘zgarishini tartibga solish bo‘yicha barcha sa’y-harakatlari yo‘qqa chiqqan. “Nur.kz”ning xabar berishicha, Stokgolm atrof-muhit instituti olimlari shunday xulosaga kelgan.
Kioto protokoliga muvofiq, Rossiya va Ukraina birgalikda amalga oshiriladigan qo‘shma loyihalar doirasida issiqxona gazlarini chiqarish bo‘yicha o‘z kvotalari bilan savdo qilish imkoniyatini qo‘lga kiritgan. Unga ko‘ra, yirik pul mablag‘lari evaziga (odatda, bu pullar investitsiya ko‘rinishida kirib kelgan) sanoatning ifloslantiruvchi moddalar ajratishini kamaytirish (SSSR parchalanishidan keyin ishlab chiqarishning qisqarishi hamda ekologik toza texnologiyalarga investitsiyalar kiritish orqali) lozim edi.
Olimlar tomonidan e’lon qilingan ma’lumotlarda Rossiya va Ukraina sanoatdan chiqayotgan ifloslantiruvchi moddalarni kamaytirishga yetarli darajada e’tibor qaratmagan, shunday bo‘lsa-da, loyiha bo‘yicha hamkorlardan bunday zararli faoliyatni qisqartirishga qaratilgan mablag‘larni olishda davom etavergan. Masalan, Germaniya va Polsha kabi boshqa mamlakatlar Kioto protokoli doirasida o‘ziga olgan majburiyatlarni namunali intizom bilan bajarishga muvaffaq bo‘lgan.
Stokgolmdagi olimlarning fikricha, Rossiya va Ukraina tomonidan Kioto kelishuvi talablarining bajarilmaganiga eng asosiy sabab — tashqi kuzatuvchilar tomonidan nazoratning yo‘qligidir. Agar mazkur bitim manfaatdor tomonlar navbatdagi muddatga uzaytiriladigan bo‘lsa, uning nazorat mexanizmlarini ishlab chiqish maqsadga muvofiq bo‘ladi, deyiladi tadqiqotchilar xulosasida.
Ma’lumot uchun, Kioto protokoli 1997-yili Yaponiyada, BMTning iqlim o‘zgarishi to‘g‘risidagi Konvensiyasi doirasida qabul qilingan.
Izoh (0)