Россия ва Украина томонидан Киото протоколи талабларига риоя этилмаётгани сабаб, халқаро ҳамжамиятнинг иссиқхона гази чиқарилиши ва иқлим ўзгаришини тартибга солиш бўйича барча саъй-ҳаракатлари йўққа чиққан. «Nur.kz»нинг хабар беришича, Стокгольм атроф-муҳит институти олимлари шундай хулосага келган.
Киото протоколига мувофиқ, Россия ва Украина биргаликда амалга ошириладиган қўшма лойиҳалар доирасида иссиқхона газларини чиқариш бўйича ўз квоталари билан савдо қилиш имкониятини қўлга киритган. Унга кўра, йирик пул маблағлари эвазига (одатда, бу пуллар инвестиция кўринишида кириб келган) саноатнинг ифлослантирувчи моддалар ажратишини камайтириш (СССР парчаланишидан кейин ишлаб чиқаришнинг қисқариши ҳамда экологик тоза технологияларга инвестициялар киритиш орқали) лозим эди.
Олимлар томонидан эълон қилинган маълумотларда Россия ва Украина саноатдан чиқаётган ифлослантирувчи моддаларни камайтиришга етарли даражада эътибор қаратмаган, шундай бўлса-да, лойиҳа бўйича ҳамкорлардан бундай зарарли фаолиятни қисқартиришга қаратилган маблағларни олишда давом этаверган. Масалан, Германия ва Польша каби бошқа мамлакатлар Киото протоколи доирасида ўзига олган мажбуриятларни намунали интизом билан бажаришга муваффақ бўлган.
Стокгольмдаги олимларнинг фикрича, Россия ва Украина томонидан Киото келишуви талабларининг бажарилмаганига энг асосий сабаб — ташқи кузатувчилар томонидан назоратнинг йўқлигидир. Агар мазкур битим манфаатдор томонлар навбатдаги муддатга узайтириладиган бўлса, унинг назорат механизмларини ишлаб чиқиш мақсадга мувофиқ бўлади, дейилади тадқиқотчилар хулосасида.
Маълумот учун, Киото протоколи 1997 йили Японияда, БМТнинг иқлим ўзгариши тўғрисидаги Конвенцияси доирасида қабул қилинган.
Изоҳ (0)