Belgiya shahzodasi Amedeo belgiyaliklar qiroli hisoblangan amakisi Filippning ruxsatisiz uylangani sabab, qirol taxtini meros qilib olish huquqidan mahrum bo‘ldi. Bu haqda “RIA Novosti” xabar bermoqda.
Monarxning o‘z singlisi — malika Astridning 29 yoshli katta o‘g‘li 2014-yilning iyulida Lili Rosbox fon Volkenshtayn bilan oila qurgandi.
Qirol Filipp Rimda bo‘lib o‘tgan to‘y marosimida qatnashgan bo‘lsa-da, Belgiya konstitutsiyasining 85-moddasiga asosan, qirolning rasmiy ijozatisiz nikohga kirgan avlodlar valiahdlik huquqidan mahrum bo‘ladi.
RTBF telekanalining qayd etishicha, konstitutsiyaga mazkur modda Leopold II (1835—1909-yillar) talabi bilan kiritilgan, u shu yo‘l bilan o‘z farzandlari — valiahd shahzoda va qizlarini nazorat qilmoqchi bo‘lgan.
Qayd etish joiz, uylanish orqali qirol taxtiga da’vosi yo‘qligini bildirgan shahzoda Amedeo valiahdlar ro‘yxatida Filippning to‘rt nafar yosh bolasi va o‘z onasi — malika Astriddan so‘ng oltinchi bo‘lib turgandi.
Ma’lumot uchun, Belgiya — konstitutsiyaviy monarxiya davlati. Rasman qirol davlat rahbari hisoblanadi, barcha qonunlar uning tasdiqlashidan so‘ng kuchga kiradi. Biroq bu jarayon shunchaki rasmiy mazmunga ega, xolos.
Izoh (0)