Бельгия шаҳзодаси Амедео бельгияликлар қироли ҳисобланган амакиси Филиппнинг рухсатисиз уйлангани сабаб, қирол тахтини мерос қилиб олиш ҳуқуқидан маҳрум бўлди. Бу ҳақда «РИА Новости» хабар бермоқда.
Монархнинг ўз синглиси — малика Астриднинг 29 ёшли катта ўғли 2014 йилнинг июлида Лили Росбох фон Волькенштайн билан оила қурганди.
Қирол Филипп Римда бўлиб ўтган тўй маросимида қатнашган бўлса-да, Бельгия конституциясининг 85-моддасига асосан, қиролнинг расмий ижозатисиз никоҳга кирган авлодлар валиаҳдлик ҳуқуқидан маҳрум бўлади.
RTBF телеканалининг қайд этишича, конституцияга мазкур модда Леопольд II (1835—1909 йиллар) талаби билан киритилган, у шу йўл билан ўз фарзандлари — валиаҳд шаҳзода ва қизларини назорат қилмоқчи бўлган.
Қайд этиш жоиз, уйланиш орқали қирол тахтига даъвоси йўқлигини билдирган шаҳзода Амедео валиаҳдлар рўйхатида Филиппнинг тўрт нафар ёш боласи ва ўз онаси — малика Астриддан сўнг олтинчи бўлиб турганди.
Маълумот учун, Бельгия — конституциявий монархия давлати. Расман қирол давлат раҳбари ҳисобланади, барча қонунлар унинг тасдиқлашидан сўнг кучга киради. Бироқ бу жараён шунчаки расмий мазмунга эга, холос.
Изоҳ (0)