Yevropa Ittifoqi umumiy mablag‘i 315 milliard yevroga teng bo‘lgan Yevropa strategik investitsiyalar fondini ishga tushirdi. Bu haqda “TASS” xabar bermoqda.
Fondni tashkil etish haqidagi bitim Bryussel shahrida Yevrokomissiya rahbari Jan-Klod Yunker, Yevrokomissiya rahbari o‘rinbosari Yurki Kataynen va Yevropa investitsiya banki prezidenti Verner Xoyer tomonidan imzolangan.
Bitim uch hujjatdan iborat bo‘lib, ular fondni boshqarish, uni moliyalashtirish va mablag‘lardan foydalanish tartibini belgilaydi.
“Fondni tashkil etish haqidagi Yevropa Ittifoqi bitimini tayyorlash uchun rekord darajada qisqa davr — atigi olti oy kerak bo‘ldi. So‘nggi 25 yildan beri biz bu qadar tezkor va aniq yo‘naltirilgan qonun ijodkorligi jarayoniga guvoh bo‘lmagandik”, — dedi Xoyer. “Yevropa yana olg‘a intilayotganini ko‘rib, juda ta’sirlanib ketyapman”, — deya qayd etdi Yunker.
“Bugungi Yevropa Ittifoqiga aynan investitsiyalar yetishmayapti, ularning hozirgi darajasi 2007-yilgi — jahon moliyaviy inqirozi boshlanishi arafasidagi ko‘rsatkichdan 15 foizga kam”, — dedi Kataynen. Uning ishonch bildirishicha, “mazkur loyiha Yevropaning o‘sishi va bandlikni ta’minlash yo‘lida muhim qadam bo‘ladi”.
Fond Yevropada strategik energetika, transport va elektron-raqamli infratuzilmalari bunyod etish, ta’lim va tadqiqotlarning alohida yo‘nalishlarini, innovatsion, ekologik jihatdan toza texnologiyalarni rivojlantirish sohalaridagi loyihalarni sarmoya bilan ta’minlash, shuningdek, kichik biznesni qo‘llab-quvvatlashga yo‘naltirilgan loyihalarni moliyalashtirishga xizmat qiladi.
Izoh (0)