AQShning Dushanbedagi elchixonasi Amerika fuqarolariga tabiiy ofatlar hukmronlik qilayotgan Tojikistonning tog‘li tumanlariga borishdan tiyilishni, ushbu hududdagi fuqarolarga esa uyerni tark etishni tavsiya qildi, deb xabar bermoqda “RIA Novosti”.
Havo haroratining yuqori bo‘lishi natijasida tog‘li hududlardagi muzlar erishi tezlashdi, natijada 16—21-iyul kunlari suv toshqinlari va o‘pirilishlar kuzatildi. Tojikiston TIV xabariga ko‘ra, 7 kishi halok bo‘ldi, yana 5 kishi izsiz yo‘qoldi. Minglab kishilar boshpanasiz qoldi.
Mamlakat iqtisodiyotiga yetkazilgan zarar 100 million dollarga baholanmoqda. Respublika hukumati ofat oqibatlarini bartaraf etish uchun dunyo hamjamiyatidan yordam so‘radi.
Amerika elchixonasi yana Tojikistonga yordam berish masalasi ustida ish olib borilayotganini qayd etgan. “Ayni vaqtda biz xalqaro hamjamiyat bilan favqulodda yordam berish masalasi bo‘yicha ish olib boryapmiz. Bizning xayollarimiz Tojikiston aholisi bilan birga”, — deb qo‘shimcha qilingan elchixona bayonotida.
Izoh (0)