Европа Иттифоқи умумий маблағи 315 миллиард еврога тенг бўлган Европа стратегик инвестициялар фондини ишга туширди. Бу ҳақда «ТАСС» хабар бермоқда.
Фондни ташкил этиш ҳақидаги битим Брюссель шаҳрида Еврокомиссия раҳбари Жан-Клод Юнкер, Еврокомиссия раҳбари ўринбосари Юрки Катайнен ва Европа инвестиция банки президенти Вернер Хойер томонидан имзоланган.
Битим уч ҳужжатдан иборат бўлиб, улар фондни бошқариш, уни молиялаштириш ва маблағлардан фойдаланиш тартибини белгилайди.
«Фондни ташкил этиш ҳақидаги Европа Иттифоқи битимини тайёрлаш учун рекорд даражада қисқа давр — атиги олти ой керак бўлди. Сўнгги 25 йилдан бери биз бу қадар тезкор ва аниқ йўналтирилган қонун ижодкорлиги жараёнига гувоҳ бўлмагандик», — деди Хойер. «Европа яна олға интилаётганини кўриб, жуда таъсирланиб кетяпман», — дея қайд этди Юнкер.
«Бугунги Европа Иттифоқига айнан инвестициялар етишмаяпти, уларнинг ҳозирги даражаси 2007 йилги — жаҳон молиявий инқирози бошланиши арафасидаги кўрсаткичдан 15 фоизга кам», — деди Катайнен. Унинг ишонч билдиришича, «мазкур лойиҳа Европанинг ўсиши ва бандликни таъминлаш йўлида муҳим қадам бўлади».
Фонд Европада стратегик энергетика, транспорт ва электрон-рақамли инфратузилмалари бунёд этиш, таълим ва тадқиқотларнинг алоҳида йўналишларини, инновацион, экологик жиҳатдан тоза технологияларни ривожлантириш соҳаларидаги лойиҳаларни сармоя билан таъминлаш, шунингдек, кичик бизнесни қўллаб-қувватлашга йўналтирилган лойиҳаларни молиялаштиришга хизмат қилади.
Изоҳ (0)