Egey dengizida cho‘kib ketgan kemadagi 17 nafar muhojir topilgani yo‘q

Turkiya va Gretsiya o‘rtasidagi Egey dengizida muhojirlarni tashiyotgan kema cho‘kib ketdi, kamida 17 kishi hozirgacha topilgani yo‘q. Bu haqda Gretsiya ma’murlariga asoslanib, Reuters ma’lum qilgan, deya xabar bermoqda “RIA Novosti”.

Gretsiya dengiz transporti vazirligi ma’lumotlariga ko‘ra, olib borilgan amaliyotlar chog‘ida 16 kishi qutqarilgan. Mamlakatning Farmakonisi va Agatonision orollari oralig‘ida kema cho‘ka boshlaganda unda 33 dan 37 nafargacha muhojir hamda ekipaj a’zolari bo‘lgan.

BMT ma’lumotlariga ko‘ra, 2015-yilning birinchi yarmi davomida O‘rtayer dengizi orqali kamida 137 ming muhojir Yevropaga kelgan. Bu o‘tgan yilga nisbatan 83 foizga ko‘pdir. Gretsiya va Italiyaga kelayotgan muhojirlarning uchdan bir qismi suriyaliklar bo‘lsa, ulardan keyingi o‘rinlarda esa Afg‘oniston va Eritreya fuqarolari qayd etilgan.