Amerikalik taniqli bokschi Floyd Meyuezer filippinlik Menni Pakyaoga qarshi jang uchun, teletranslyatsiyalardan tushgan daromadlarni ham qo‘shib hisoblaganda, umumiy hisobda 220—230 million dollar ishlab topdi. Bu haqda “TASS” xabar bermoqda.
Bokschilarning gonorarlari 60 ga 40 nisbatida amerikalik foydasiga taqsimlangan edi. Pakyao umumiy hisobda 150 million dollar ishlab topdi, biroq bu pulning bir qismini u promouterlarga to‘lashi kerak, Meyuezer esa xarajatlarning bu qismidan ozod – u o‘z promouterlik kompaniyasiga ega.
Jang pulli translyatsiyani ko‘rish huquqlarini sotish hajmi bo‘yicha rekord o‘rnatdi – jangni yuqori sifatda ko‘rmoqchi bo‘lgan 4,4 million kishi 100 dollardan to‘ladi (oddiy sifatdagi translyatsiya narxi 90 dollar edi). Jang tashkilotchilari mazkur teletranslyatsiyalardan 400 million, chiptalar savdosidan esa 72 million dollar ishladi.
ESPN ma’lumotlariga ko‘ra, chiptalar va telekompaniyalarga huquqlarni sotishdan tushgan umumiy daromad 600 million dollarga yaqinlashdi va professional boks tarixidagi rekord ko‘rsatkichga aylandi. Shunday qilib, Meyuezerning pay-per-view tizimida translyatsiya qilingan 14 ta jangi 1,3 milliard dollar ishladi.
Izoh (0)