30-iyun kuni “Sport” telekanalida sharhlovchilar Diyor Imomxo‘jayev hamda Dilshodbek To‘xtabekov muallifligidagi “Sokker klub” ko‘rsatuvining navbatdagi soni efirga uzatildi. Ko‘rsatuvda O‘zbekiston yoshlar terma jamoasining jahon chempionatidagi ishtirokiga to‘xtalib o‘tilgan, deb xabar beradi “Kun.uz”.
Yoshlar jamoasi bilan avvalroq ishlagan Sergey Lushan yigitlar bilan yanada yaxshiroq natijaga erishish mumkinligini qayd etish qatorida, 2018-yilgi jahon chempionatiga yo‘llanma olish deyarli ilojsiz ekaniga sha’ma qilib o‘tgan. Futbolchilardan Zabihullo O‘rinboyev, Mirjamol Qosimov, Eldor Shomurodov, Doston Hamdamov, Akrom Komilov, Otabek Shukurov, Rustam Ashurmatov kabilar esa yoshlar jamoasida murabbiylarning ketma-ket almashinuvi natijaga o‘zining salbiy ta’sirini ko‘rsatgani haqida aytgan. Bu borada ular Aleksey Yevstafeyev, Sergey Lushan hamda Ravshan Haydarovning o‘yin uslubini ochib berishga harakat qilgan.
“Sokker klub”ga mehmon sifatida taklif etilgan “Olmaliq” klubi matbuot kotibi Baxtiyor Shirinov bir qator achchiq haqiqatlarga til tekkazib o‘tganini e’tirof etish kerak. U Dilshod Nuraliyevga Malibu berib, uni terma jamoadan ketkazib yuborishganidan tortib, O‘zbekiston o‘smirlar terma jamoasida o‘z yoshini o‘zgartirib to‘p surgan hamda muvaffaqiyatga erishgan 4 nafar futbolchining ismi-shariflari bilan keltirib o‘tgan.
Loyiha muallifining so‘zlariga ko‘ra, ko‘rsatuv 4-iyul – shanba kuni tonggi 09:50 da takroran namoyish etiladi. Kanalga bo‘layotgan tinimsiz qo‘ng‘iroqlar sababli “Sokker klub” 12-iyul kuni soat 20:45 da yana bir marta namoyish etilishi mumkin.
Manba qayd etishicha, “Sokker klub” har oyning so‘nggi kunida, ya’ni, bir oyda bir marta efir yuzini ko‘radi.
Izoh (0)