Америкалик боксчи Флойд Мэйуэзер Пакьяо билан жангдан камида 220 миллион доллар ишлади

Америкалик таниқли боксчи Флойд Мэйуэзер филиппинлик Менни Пакьяога қарши жанг учун, телетрансляциялардан тушган даромадларни ҳам қўшиб ҳисоблаганда, умумий ҳисобда 220—230 миллион доллар ишлаб топди. Бу ҳақда «ТАСС» хабар бермоқда.

Боксчиларнинг гонорарлари 60 га 40 нисбатида америкалик фойдасига тақсимланган эди. Пакьяо умумий ҳисобда 150 миллион доллар ишлаб топди, бироқ бу пулнинг бир қисмини у промоутерларга тўлаши керак, Мэйуэзер эса харажатларнинг бу қисмидан озод – у ўз промоутерлик компаниясига эга.

Жанг пулли трансляцияни кўриш ҳуқуқларини сотиш ҳажми бўйича рекорд ўрнатди – жангни юқори сифатда кўрмоқчи бўлган 4,4 миллион киши 100 доллардан тўлади (оддий сифатдаги трансляция нархи 90 доллар эди). Жанг ташкилотчилари мазкур телетрансляциялардан 400 миллион, чипталар савдосидан эса 72 миллион доллар ишлади.

ESPN маълумотларига кўра, чипталар ва телекомпанияларга ҳуқуқларни сотишдан тушган умумий даромад 600 миллион долларга яқинлашди ва профессионал бокс тарихидаги рекорд кўрсаткичга айланди. Шундай қилиб, Мэйуэзернинг pay-per-view тизимида трансляция қилинган 14 та жанги 1,3 миллиард доллар ишлади.