So‘nggi bir yil davomida “Dinamo” klubida faoliyat yuritib kelgan tajribali mutaxassis Tachmurod Agamurodov birinchi davraning so‘nggi o‘yini “Olmaliq”ga qarshi bahsdan so‘ng jamoa bilan xayrlashdi. Bu haqda “Dinamo” matbuot xizmati xabar qilmoqda.
Tachmurod Agamurodov sog‘lig‘idagi muammolar sababli, o‘z arizasiga binoan “Dinamo” bosh murabbiyligi lavozimidan iste’foga chiqdi.
Agamurodov “Olmaliq”ga qarshi uchrashuvdan keyin iste’foga chiqish sabablarini aytib o‘tdi.
“Bugungi o‘yindan so‘ng hozirgi lavozimimdan iste’foga chiqishga qaror qildim. Jamoani elitada munosib ishtirok etishi uchun qo‘limdan kelgancha harakat qildim. Afsuski, chempionatda munosib ishtirok etish uchun birgina murabbiy hammasini amalga oshira olmaydi. Buning uchun butun struktura harakatda bo‘lishi lozim.
Shu o‘rinda bizni har qanday holatda ham qo‘llab-quvvatlab turgan ko‘p ming sonli jamoa ishqibozlariga tashakkur izhor etaman. Bilaman ular jamoani yetakchi o‘rinlarda ko‘rishni istashadi. Ammo meni to‘g‘ri tushunishlarini istayman. Men jamoa uchun o‘z tajribamdan kelib chiqib barchasini qildim. Ammo katta natijalarga bir kishi erisha olmaydi”, — deb murabbiyning so‘zlaridan keltiradi “Championat.asia”.
Izoh (0)