O‘zbekiston milliy terma jamoasi bosh murabbiyi Samvel Babayan 2-iyul kuni Oliy Liga klublari bosh murabbiylari bilan uchrashdi. Bu haqda O‘FF matbuot xizmatiga tayanib, “Uff.uz” xabar bermoqda.
Bungacha Samvel Babayan jurnalistlar va fan-klublar rahbarlari bilan uchrashgan edi.
“O‘rganishning kechi yo‘q. O‘rganishdan tortinmayman. Murabbiylar, futbolchilar, jurnalistlar, muxlislarni eshitaman, ulardan o‘rganaman”, — dedi Samvel Babayan.
Oliy Liga klublari bosh murabbiylari ishtirokidagi uchrashuvda O‘FF Terma jamoalar markazi rahbari Asqar Tolibjonov, shuningdek, O‘zPFL bosh direktori Farhod Magametov ham ishtirok etdi.
Babayanning fikricha, “O‘zbekistonda futbolning keyingi rivoji terma jamoalarning xalqaro musobaqalardagi ishtirokiga bog‘liq”.
“Men uchun har qanday fikr qadrli. Men hammani eshitishga tayyorman. Xudo ko‘rib turibdi, niyatim bir – terma jamoani JChga olib chiqish”, — dedi milliy terma jamoa bosh murabbiyi.
“Menga ishonch bildirildimi, uni oqlash uchun borimni berib ishlayman, zero bu Vatanimizning bosh jamoasi!”, — deya qo‘shimcha qildi O‘zbekiston milliy terma jamoasi bosh murabbiyi Samvel Babayan.
Eslatib o‘tamiz, Samvel Babayan 23-iyun kuni Mirjalol Qosimovning o‘rniga O‘zbekiston milliy terma jamoasi bosh murabbiyi etib tayinlangandi.
Izoh (0)