Тачмурод Агамуродов «Динамо» бош мураббийлигидан истеъфога чиқди

Сўнгги бир йил давомида «Динамо» клубида фаолият юритиб келган тажрибали мутахассис Тачмурод Агамуродов биринчи давранинг сўнгги ўйини «Олмалиқ»га қарши баҳсдан сўнг жамоа билан хайрлашди. Бу ҳақда «Динамо» матбуот хизмати хабар қилмоқда.

Тачмурод Агамуродов соғлиғидаги муаммолар сабабли, ўз аризасига биноан «Динамо» бош мураббийлиги лавозимидан истеъфога чиқди.

Агамуродов «Олмалиқ»га қарши учрашувдан кейин истеъфога чиқиш сабабларини айтиб ўтди.

«Бугунги ўйиндан сўнг ҳозирги лавозимимдан истеъфога чиқишга қарор қилдим. Жамоани элитада муносиб иштирок этиши учун қўлимдан келганча ҳаракат қилдим. Афсуски, чемпионатда муносиб иштирок этиш учун биргина мураббий ҳаммасини амалга ошира олмайди. Бунинг учун бутун структура ҳаракатда бўлиши лозим.

Шу ўринда бизни ҳар қандай ҳолатда ҳам қўллаб-қувватлаб турган кўп минг сонли жамоа ишқибозларига ташаккур изҳор этаман. Биламан улар жамоани етакчи ўринларда кўришни исташади. Аммо мени тўғри тушунишларини истайман. Мен жамоа учун ўз тажрибамдан келиб чиқиб барчасини қилдим. Аммо катта натижаларга бир киши эриша олмайди», — деб мураббийнинг сўзларидан келтиради «Championat.asia».