Joriy yilning 3—14-iyul kunlari Janubiy Koreyaning Kvanju shahrida talabalar o‘rtasida Butunjahon Universiada o‘yinlari o‘tkaziladi. Bu yilgi musobaqalarda 120 davlatdan 12 000 nafar talaba sportchi 21 ta sport turida g‘oliblik uchun kurash olib boradi, deb xabar beradi O‘zbekiston Milliy olimpiya qo‘mitasi matbuot xizmati.
Qariyb ikki hafta davomida o‘tkaziladigan mazkur musobaqalarda jami 272 komplekt medallar o‘ynalib, o‘yinlarning tantanali ochilish marosimi 3-iyul kuni, yopilishiga bag‘ishlangan tadbir esa 14-iyul kuni bo‘lib o‘tadi.
Butunjahon Universiada—2015 o‘yinlarida O‘zbekiston sharafini 31 nafar sportchi akademik eshkak eshish, yengil atletika, taekvondo (WTF), tennis, qilichbozlik, sport gimnastikasi, badiiy gimnastika va dzyudo kabi sport turlari bo‘yicha o‘tkaziladigan musobaqalarda ishtirok etadi.
Ma’lumot uchun. Butunjahon Universiada o‘yinlari Universitetlar sporti xalqaro federatsiyasi (FISU) tomonidan tashkil qilinib, talaba sportchilar o‘rtasida o‘tkaziladi. Birinchi Universiada o‘yinlari 1959-yilda Italiyaning Turin shahrida o‘tkazilgan bo‘lib, shundan buyon har ikki yilda tashkil etib kelinadi.
O‘zbekiston sport delegatsiyasi 1999-yildan buyon mazkur o‘yinlarda ishtirok etib keladi. O‘zbekistonlik sportchi talabalar 2001-yilda 1 ta oltin, 2003-yilda 2 ta oltin, 2005-yilda 1 ta oltin, 2007-yilda 1 tadan oltin va kumush, 2009-yilda 2 ta bronza, 2011-yilda 1 ta bronza, 2013-yilda esa 2 ta oltin, 7 ta kumush va 10 ta bronza medaliga sazovor bo‘lgan.
Izoh (0)