Жорий йилнинг 3—14 июль кунлари Жанубий Кореянинг Кванжу шаҳрида талабалар ўртасида Бутунжаҳон Универсиада ўйинлари ўтказилади. Бу йилги мусобақаларда 120 давлатдан 12 000 нафар талаба спортчи 21 та спорт турида ғолиблик учун кураш олиб боради, деб хабар беради Ўзбекистон Миллий олимпия қўмитаси матбуот хизмати.
Қарийб икки ҳафта давомида ўтказиладиган мазкур мусобақаларда жами 272 комплект медаллар ўйналиб, ўйинларнинг тантанали очилиш маросими 3 июль куни, ёпилишига бағишланган тадбир эса 14 июль куни бўлиб ўтади.
Бутунжаҳон Универсиада—2015 ўйинларида Ўзбекистон шарафини 31 нафар спортчи академик эшкак эшиш, енгил атлетика, таэквондо (WTF), теннис, қиличбозлик, спорт гимнастикаси, бадиий гимнастика ва дзюдо каби спорт турлари бўйича ўтказиладиган мусобақаларда иштирок этади.
Маълумот учун. Бутунжаҳон Универсиада ўйинлари Университетлар спорти халқаро федерацияси (FISU) томонидан ташкил қилиниб, талаба спортчилар ўртасида ўтказилади. Биринчи Универсиада ўйинлари 1959 йилда Италиянинг Турин шаҳрида ўтказилган бўлиб, шундан буён ҳар икки йилда ташкил этиб келинади.
Ўзбекистон спорт делегацияси 1999 йилдан буён мазкур ўйинларда иштирок этиб келади. Ўзбекистонлик спортчи талабалар 2001 йилда 1 та олтин, 2003 йилда 2 та олтин, 2005 йилда 1 та олтин, 2007 йилда 1 тадан олтин ва кумуш, 2009 йилда 2 та бронза, 2011 йилда 1 та бронза, 2013 йилда эса 2 та олтин, 7 та кумуш ва 10 та бронза медалига сазовор бўлган.
Изоҳ (0)