Raqamli inqilob natijasida ko‘plab kompaniyalar yo‘qolib ketishi va bozorlar o‘z yo‘nalishini qayta ko‘rib chiqishi mumkin. Raqamli o‘zgarishlar biznesi global markazi (DBT Center) tomonidan tayyorlangan hisobotda qayd etilishicha, bu jarayonlar juda katta tezlikda yuz beradi, deya xabar bermoqda Infocom.uz.
Hisobot 13 mamlakat (Avstraliya, Braziliya, Buyuk Britaniya, Germaniya, Hindiston, Italiya, Kanada, Xitoy, Meksika, Rossiya, AQSh, Fransiya va Yaponiya)dagi 12 tarmoqda faoliyat olib boruvchi 941ta kompaniya rahbarlari o‘rtasida o‘tkazilgan so‘rovnoma natijalariga asoslangan.
Tadqiqot shuni ko‘rsatdiki, raqamli inqilob natijasida tadqiq etilgan 12 tarmoqdagi kompaniyalarning 40 foizi yaqin besh yilda o‘z faoliyatini tugatadi. Shunga qaramay, kompaniyalarning 45 foizi mazkur masalani direktorlar kengashi darajasida muhokama qilish shart emas, deb hisoblaydi.
So‘rovnomada ishtirok etgan rahbarlarning aksariyati biznes va jamiyatning raqamlashtirishning ijobiy ta’sirlari ko‘pligini tan oladi. Xususan, 75 foiz respondentlar raqamli inqilobni taraqqiyot ko‘rinishlaridan biri deb hisoblaydi. Ayni vaqtda, 43 foiz rahbarlar raqamli inqilob bilan bog‘liq xavflarni ko‘rmayapti yoki bunga jiddiy e’tibor qaratmayapti.
Tadqiqot doirasida qamrab olingan 12 soha orasida yaqin besh yildagi raqamli o‘zgarishlar davrida eng katta salohiyatga yuqori texnologik mahsulotlar va xizmatlarni taklif qiluvchilar ega bo‘ladi. Reytingning yuqori qismidan, shuningdek, axborotni qayta ishlash bilan bevosita bog‘liq boshqa sohalar – OAV, ko‘ngilochar sanoat, telekommunikatsiya, moliyaviy xizmatlar va chakana savdo ham o‘rin olgan.
Izoh (0)