O‘zbekiston matbuot nashrlari ichida birinchilardan bo‘lib “Xabar” gazetasining Android operatsion tizimida ishlaydigan qurilmalar uchun mo‘ljallangan mobil ilovasi ishlab chiqildi. Infocom.uz’ning xabar berishicha, iPhone va iPad qurilmalari egalari ham yaqin kunlar ichida App Store do‘konidan mobil ilovani ko‘chirib olishlari mumkin bo‘ladi.
Axborot texnologiyalari va kommunikatsiyalarini rivojlantirish vazirligi nashri hisoblangan “Xabar” gazetasi tahrir hay’ati raisi Xurshid Mirzohidovning tashabbusi va vazirlik homiyligida hamda BePro yosh dasturchilar markazi bilan hamkorlikda matbuot va ommaviy axborot vositalari xodimlari kuni arafasida gazetaning o‘ziga xos mobil ilovasi taqdim qilindi.
Endilikda “Xabar” gazetasini bosma shaklda qanday bo‘lsa, xuddi shundayligicha mobil qurilmalar orqali elektron shaklda o‘qish imkoniyati bor. Nashrning yangi soni avtomatik ravishda mobil qurilmada ochiladi. Sahifalarni ekranda “varaqlab”, yaqinlashtirib, yirikroq shriftlarda mutolaa qilish mumkin.
Gazetaning elektron shakli mobil ilovada har hafta juma kuni yangilanadi. Avvalgi sonlar esa arxivga tushadi. Arxivlarni qurilmaga yuklab olish va internet o‘chirilgan holatda ham bemalol istalgan joyda gazetani o‘qish imkoniyati bor.
Bundan tashqari, mobil ilovada O‘zbekiston axborot texnologiyalari tizimi, jahon AKT olamida ro‘y berayotgan yangiliklar, tahliliy maqolalar kun davomida yangilanib boriladi. Mobil ilovani yuklab olish bepul.
Izoh (0)