Microsoft asoschisi va direktorlar kengashi raisi Bill Geyts ekologik texnologiyalarga shaxsiy investitsiyalari hajmini yaqin besh yil ichida ikki barobar oshirib, 2 milliard dollarga yetkazish niyatida. Bu haqda RBC.ru xabar bermoqda.
Geytsning qayd etishicha, u dastlabki bosqichda turgan o‘nlab kompaniyalarga 1 milliard dollar miqdorida sarmoya kiritgan. Bu kompaniyalar orasida yangi avlod akkumlyatorlari va havodan uglerodni yutib yuboruvchi texnologiyalarni ishlab chiqaruvchilar bor.
Milliarderning so‘zlariga ko‘ra, u o‘z mablag‘larini 15ta kompaniyaga bevosita, yana 30ta kompaniyaga esa Khosla Ventures va Kleiner Perkins venchur fondlari orqali kiritgan.
Geyts jahon mamlakatlari hukumatlarini qayta tiklanuvchi energetika sohasidagi fundamental tadqiqotlar uchun imkon qadar ko‘proq sarmoya ajratishga chaqirdi.
Bundan tashqari, Geyts qayta tiklanuvchi energiyalarni o‘rganishni axborot texnologiyalari sohasining dastlabki kunlari bilan taqqoslab, vaqti kelib muvaffaqiyat qozonadigan kompaniyalarni qo‘llab-quvvatlagan investorlar juda ko‘p pul topishini taxmin qildi.
Izoh (0)