Рақамли инқилоб натижасида 12 соҳадаги компанияларнинг 40 фоизи яқин беш йилда йўқолиб кетади

Рақамли инқилоб натижасида кўплаб компаниялар йўқолиб кетиши ва бозорлар ўз йўналишини қайта кўриб чиқиши мумкин. Рақамли ўзгаришлар бизнеси глобал маркази (DBT Center) томонидан тайёрланган ҳисоботда қайд этилишича, бу жараёнлар жуда катта тезликда юз беради, дея хабар бермоқда Infocom.uz.

Ҳисобот 13 мамлакат (Австралия, Бразилия, Буюк Британия, Германия, Ҳиндистон, Италия, Канада, Хитой, Мексика, Россия, АҚШ, Франция ва Япония)даги 12 тармоқда фаолият олиб борувчи 941та компания раҳбарлари ўртасида ўтказилган сўровнома натижаларига асосланган.

Тадқиқот шуни кўрсатдики, рақамли инқилоб натижасида тадқиқ этилган 12 тармоқдаги компанияларнинг 40 фоизи яқин беш йилда ўз фаолиятини тугатади. Шунга қарамай, компанияларнинг 45 фоизи мазкур масалани директорлар кенгаши даражасида муҳокама қилиш шарт эмас, деб ҳисоблайди.

Сўровномада иштирок этган раҳбарларнинг аксарияти бизнес ва жамиятнинг рақамлаштиришнинг ижобий таъсирлари кўплигини тан олади. Хусусан, 75 фоиз респондентлар рақамли инқилобни тараққиёт кўринишларидан бири деб ҳисоблайди. Айни вақтда, 43 фоиз раҳбарлар рақамли инқилоб билан боғлиқ хавфларни кўрмаяпти ёки бунга жиддий эътибор қаратмаяпти.

Тадқиқот доирасида қамраб олинган 12 соҳа орасида яқин беш йилдаги рақамли ўзгаришлар даврида энг катта салоҳиятга юқори технологик маҳсулотлар ва хизматларни таклиф қилувчилар эга бўлади. Рейтингнинг юқори қисмидан, шунингдек, ахборотни қайта ишлаш билан бевосита боғлиқ бошқа соҳалар – ОАВ, кўнгилочар саноат, телекоммуникация, молиявий хизматлар ва чакана савдо ҳам ўрин олган.