Koreyalik narkologlar alkogolizmga qarshi kurashda samara ko‘rsatgan maxsus o‘yinni ishlab chiqdi, deya xabar bermoqda “Mail.ru”.
Seuldagi Chunan universitetining bir guruh olimlari ta’kidlashicha, surunkali alkogolizmdan azob chekkan 12 bemordan iborat tajriba guruhi o‘yin tufayli spirtli ichimlikdan butunlay voz kechgan.
Virtual reallik vositalaridan foydalanib alkogolizmni davolash metodikasi asosida shartli reaksiyaning so‘nishi fenomeni yotadi. O‘yin miyadagi salbiy his-tuyg‘ular va bemorni tashvishlantirayotgan mavzuni bog‘lab turuvchi zanjirlar yo‘qolishini ta’minlaydi.
O‘yin uch bosqichli bo‘lib, birinchi bosqichda bemor tinchlantiruvchi sharoitga tushib qoladi. Ikkinchisida virtual reallikdagi restoran va u yerda tortilayotgan taomlarni ko‘rish mumkin bo‘ladi, biroq dasturxonda alkogol bo‘lmaydi. Uchinchi bosqichda esa bemor spirtli ichimliklarni suiiste’mol qilishning salbiy oqibatlarini ko‘radi.
Davolash jarayonida shifokorlar tomograflar yordamida bemor miyasining ishini kuzatib bordi. Ularning miyasidagi huzur-halovat markazi o‘z me’yoriga keldi.
Izoh (0)