AQSh va Buyuk Britaniya maxsus xizmatlari Kasperskiy kompaniyasiga hujum qilgani haqidagi axborot tasdiqlanmadi

“Kasperskiy laboratoriyasi” ixtiyorida uning antivirus mahsulotlari ishlash algoritmlari AQSh Milliy xavfsizlik agentligi (MXA) va Buyuk Britaniya hukumat aloqasi markazi tomonidan kuzatilganini ochiq ko‘rsatib beruvchi dalillar yo‘q. “TASS”ning xabar berishicha, bu haqda kompaniya asoschisi va bosh direktori Yevgeniy Kasperskiy ma’lum qilgan.

Uning so‘zlariga ko‘ra, MXA sobiq agenti Edvard Snouden tomonidan fosh etilan va The Intercept nashrida e’lon qilingan hujjatlardagi ma’lumot yetarli emas. Bu hujjatlarda MXA va Buyuk Britaniya hukumat aloqasi markazi kiberxavfsizlik bo‘yicha eng yirik kompaniyalar, xususan, “Kasperskiy laboratoriyasi” ortidan josuslik qilgani haqida so‘z boradi.

“Biz mahsulotni butun dunyo bo‘ylab tarqatamiz. Qaysidir ikkinchi odam bu mahsulotni tadqiq etadi. Uchinchi bir kishi esa ikkinchi odam mahsulotni tadqiq etayotgani haqida gapiradi. Qanday dalillar bo‘lishi mumkin? Bizda dalillar yo‘q. Faqatgina o‘zini guvoh deb atayotgan odamlarning so‘zlari bor, xolos. Ular nima topishgan? Hech nima. Biz baxtiyormiz. Tashqi audit uchun katta rahmat!”, - deya qayd etdi Kasperskiy.

Biroq, “Kasperskiy laboratoriyasi”ning korporativ munosabatlar bo‘yicha direktori Denis Zenkinning so‘zlariga ko‘ra, kompaniya bu hodisa haqida Rossiya huquqni muhofaza qilish organlariga axborot bergan.