Yaponiyada ishlab chiqilgan va soatiga 603 kilometr tezlikda harakatlanishga muvaffaq bo‘lgan maglev (magnit yostiqchada harakatlanuvchi poyezd) Ginnesning rekordlar kitobiga rasman kiritildi. Bu haqda “TASS” xabar bermoqda.
“Ushbu maqom bizni mazkur texnologiyalarni yanada takomillashtirish ustida ishlashga undaydi”, - deyiladi poyezdni ishlab chiqqan JR Tokai kompaniyasi tomonidan tarqatilgan bayonotda.
Yaponiyaning tog‘li Yamanasi prefekturasida qurilgan 42 kilometrli tajriba temiryo‘lida rekordchi maglev 21-aprel kuni soatiga 603 kilometr tezlikda harakatlangan edi. Avvalgi rekord 16-aprel kuni o‘rnatilgan, o‘shanda poyezd soatiga 590 kilometr tezlikda harakatlangan edi. Ekspress imkoni bor barcha rekordlarni urib bo‘lganidan so‘ng, JR Tokai temiryo‘l kompaniyasi endi asosiy e’tiborni maksimal darajada barqaror va xavfsiz harakatni ta’minlashga qaratishini ma’lum qilgandi.
Yaponiyada magnit yostiqchada harakatlanuvchi tezyurar poyezdlarni ishlab chiqish bo‘yicha harakatlar XX asrning 70-yillarida boshlangan bo‘lib, 2003-yili JR Tokai temiryo‘l kompaniyasi tomonidan ishlab chiqilgan ekspress soatiga 581 kilometr tezlikda harakatlanib, jahon rekordini o‘rnatgan edi. 2011-yili Yaponiya hukumati Tokio va Xonsyu oroli markaziy qismidagi Nagoya shaharlarida orasida 286 kilometrli ilk tijoriy maglev temiryo‘lini qurish bo‘yicha rejani ma’qulladi. Qiymati 45,8 milliard dollarga teng bo‘lgan temiryo‘l qurilishi 2014-yilda boshlangan bo‘lib, 2027-yilda bitadi.
Magnit yostiqchada harakatlanuvchi ekspress Tokio va Nagoya oralig‘idagi masofani soatiga o‘rtacha 500 kilometr tezlik bilan 40 daqiqada bosib o‘tadi. Hozirgi vaqtda foydalanilayotgan “Sinkansen” tezyurar poyezdlari esa buning uchun 1 soat 28 daqiqa vaqt sarflaydi.
Izoh (0)