Microsoft асосчиси ва директорлар кенгаши раиси Билл Гейтс экологик технологияларга шахсий инвестициялари ҳажмини яқин беш йил ичида икки баробар ошириб, 2 миллиард долларга етказиш ниятида. Бу ҳақда RBC.ru хабар бермоқда.
Гейтснинг қайд этишича, у дастлабки босқичда турган ўнлаб компанияларга 1 миллиард доллар миқдорида сармоя киритган. Бу компаниялар орасида янги авлод аккумляторлари ва ҳаводан углеродни ютиб юборувчи технологияларни ишлаб чиқарувчилар бор.
Миллиардернинг сўзларига кўра, у ўз маблағларини 15та компанияга бевосита, яна 30та компанияга эса Khosla Ventures ва Kleiner Perkins венчур фондлари орқали киритган.
Гейтс жаҳон мамлакатлари ҳукуматларини қайта тикланувчи энергетика соҳасидаги фундаментал тадқиқотлар учун имкон қадар кўпроқ сармоя ажратишга чақирди.
Бундан ташқари, Гейтс қайта тикланувчи энергияларни ўрганишни ахборот технологиялари соҳасининг дастлабки кунлари билан таққослаб, вақти келиб муваффақият қозонадиган компанияларни қўллаб-қувватлаган инвесторлар жуда кўп пул топишини тахмин қилди.
Изоҳ (0)