Хитой коммунистик партияси Сиёсий бюросининг ҳуқуқни муҳофаза қилиш ва махсус хизмат органлари фаолиятини мувофиқлаштириш масалалари бўйича собиқ аъзоси Чжоу Юнкан порахўрлик, хизмат мансабини суиистеъмол қилиш ва давлат сирини ошкор этиш жиноятларини содир этганликда айбдор деб топилиб, умрбод озодликдан маҳрум этилди. Бу ҳақда ТАСС хабар бермоқда.
Бундан ташқари, Тянцзин шаҳри суди қарорига асосан, Чжоу Юнкан сиёсий ҳуқуқлардан ҳам умрбод маҳрум этилди, мол-мулки эса мусодара қилинади. Юнкан ўзига қўйилган айбларни тан олиб, амалга оширган жиноятлари «партия ишига зарар етказгани ва жамиятга салбий таъсир қилгани»ни айтган.
Тергов маълумотларига кўра, Чжоу Юнкан умумий 130 миллион юань (21 миллион доллардан ортиқ) миқдорида пора олган. У мазкур маблағ эвазига, хизмат мансабидан фойдаланиб, У Бин, Дин Сюефен, Вен Сишан, Чжоу Хао ва Сзян Цземин каби шахсларга 2,1 миллиард юань (343 миллион доллардан ортиқ) миқдорида ноқонуний даромад олишга ёрдам берган.
Чжоу Юнкан сўнгги ўн йилликда Хитойда айблов ҳукм чиқарилган энг юқори мартабали партия ва давлат арбобидир.
Изоҳ (0)