Polsha parlamentining quyi palatasi (seym) spikeri Radoslav Sikorskiy yuqori martabali amaldorlarning suhbatini eshitish bilan bog‘liq mojarolar tufayli iste’fo berdi, deb xabar qiladi “Meduza”.
Sog‘liqni saqlash vaziri Bartosh Arlukovich, sport vaziri Anjey Bernat va davlat g‘aznasi vaziri Vlodimej Karpinskiy ham iste’foga chiqish uchun ariza yozdi. Bundan tashqari, bir nechta vazir o‘rinbosarlari va hukumat rahbari maslahatchilari ham o‘z lavozimini tark etdi.
Polsha matbuotida 2013—2014-yillarda Varshavaning restoranlaridan birida yuqori martabali amaldorlarning uchrashuvlaridagi maxfiy suhbati matni chop qilinganidan keyin Yeva Kovach boshchiligida Polshani boshqarayotgan hukumatning obro‘si tushib ketdi.
Amaldorlarning suhbati birinchi marta 2014-yil o‘rtalarida chop etilgandi. O‘shanda Polsha prokuraturasi noqonuniy tinglash ishi bo‘yicha tekshiruvlarni boshlagandi. Iyun oyi boshida tergov ishlarining materiallari internetda paydo bo‘ldi va suhbatni eshitish mojarosi yana diqqat markaziga chiqdi.
Izoh (0)